點解我個小朋友咁細膽
好多家長都會覺得自己個小朋友好細膽，面對新事物都唔敢去嘗試。或者要花好多時間先至敢去探索。今日我想講下點樣去培養小朋友嘅冒險精神。
其實小朋友嘅冒險精神嘅培養真係好重要。 對佢大個嘅成就構成非常重要嘅影響。 一個人有冇成就，好大嘅因素就是乎你有幾多個勇氣去挑戰自己的生命。
大家試諗下有冇見過:
有啲同事講咗辭職講咗六七八年 都仲坐咗喺度？
又話想去working holiday，講到35歲都未去到。然後結咗婚有咗小朋友，就話家庭都唔容許。
成日覺得自己underpaid，但係連敲下老細房門要求加薪都唔夠膽。
個男仔對自己好差，但就連分手都做唔到。
但係有啲人就反而，可以為自己突破舒適區即使結咗婚有咗小朋友，有份正職，都可以帶領一班中學生喺香港製造一隻香港嘅飛機，更加成功可以啟航。
其實呢個情況，我哋都可以叫做冒險的精神，離開舒適區嘅勇氣。
冒險精神其實每分四個層次
第一個層次最輕鬆我簡稱為食瞓屙。 呢個層次嘅冒險, 每個人都感到輕鬆自在,冇挑戰性可言。大家最常習慣做嘅事情。 對小朋友嚟講就係食嘢、瞓覺同埋屙尿屙屎。 對大人嚟講最習慣最輕鬆自在最冇壓力嘅事情可能係訓喺梳化度睇電視、喺屋企附近商場食完飯行返屋企、又或者係望住個盆栽放空發牛豆。
第二個層次我簡稱叫做玩。 呢個層次開始有少少嘅刺激，有少少挑戰性，心情亦都會興奮。 對小朋友嚟講，可能就係去公園玩、玩玩具、去行山、去瀡滑梯。 對大人嚟講，可能係做運動、打機、工作上精益求精挑戰自己、新嘅興趣班、學日文、韓文、去讀返個夜校。
第三個層次我就會叫做冒險。呢個層次,激刺感就會再多好多,更具挑戰性。會面對心裏面嘅恐懼、會緊張，對未知的你未來會怕。 對小朋友嚟講可能係是試新嘅食物 、試下玩高空繩網、試下一個人落街、去瀡一條又長又高嘅滑梯。 離開daddy媽咪去露營。 對大人黎講可能係轉工， 創業， 辭職去working holiday。 同男女朋友分手。
去到第四個層次，其實簡單嚟講差唔多係去到玩命， 去玩笨豬跳等等，呢個我就唔花時間講啦。
點解冒險會分幾個層次嚟形容呢。 因為好似日打機咁樣 ，一開始要完成一啲輕鬆啲嘅關卡，跟住之後先至會有能力去挑戰下一個關卡，如果一開始叫你去打大佬，你就會嚇到唔夠兩秒就game over。
所以當小朋友冇膽唔敢冒險嘅時候。例如唔敢去到日本瀡一條好長的滑梯。咁我地係唔係要多鼓勵佢去勇敢挑戰呢？將心比心，如果我唔敢玩跳樓機，你點鼓勵我都無用。跳樓機的恐懼感實在太強烈。
我哋可以先睇下佢哋唔敢冒險係屬於邊一個層次。 例如我哋帶小朋友去日本見到一條好長好高嘅滑梯，想鼓勵小朋友去試下嘅時候，咁佢話唔敢喎。咁呢一個係屬於第三個層次冒險嘅層次。 咁我哋去睇下第二個層次佢有冇足夠嘅信心先。 咁即係話如果一條短嘅滑梯佢之前有冇玩過呢？有冇信心呢有冇玩過好多次啦。 原來佢連普通去公園嘅瀡滑梯都唔夠膽玩㗎喎。 又或者玩嘅時候，佢得玩得唔自在 。 爬上去唔得，一定要行上去。由滑梯另外一邊行上去又話唔得，諸多限制 。瀡滑梯坐得衰啲又唔得，比人嚇話：因住喺上面跌落嚟呀。咁就難怪佢長嘅滑梯唔敢玩。
咁我哋再去探究點解佢連短嘅滑梯都唔夠膽玩。咁我哋再去上一個層次去睇下啦。 第一個層次睇落好基本，食訓屙應該係全部小朋友都會應付到。 但係係咪又係事實呢？如果個小朋友屙尿屙出界，佢會唔會畀人鬧？ 去完廁所抆尿嘅時候抆得唔乾淨，食飯食到周圍污糟曬 ，又會唔會俾屋企人投訴呢？瞓覺瞓唔飽，起身冇精神。或者去到好大個都仲會尿床，引起屋企人嘅煩惱 。或者我是問一下，或者一個被稱為基本嘢/少少嘢都做唔掂， 抆尿都唔乾淨嘅小朋友 。佢又點能夠去冒險呢？
其實另外一點, 當你畀呢個題目吸引。小不免你都會有少少嫌棄嘅眼光。 嫌小朋友點解會咁細膽。 一種嫌棄嘅感覺，就算唔講出口，小朋友係感受到嘅。嫌棄眼光、好高嘅期望，對佢嚟講都構成一種壓力，都會令佢唔願意離開舒適區，去面對恐懼面對唔舒服嘅感覺：令你失望。
大人同小朋友一樣。 大人有信心做好基本嘢之後， 就會夠膽 同上司講自己可以接受更加多嘅工作。 接受更多嘅工作仍然可以應付到嘅時候。佢就會夠膽 同上司要求升職加薪接受咁高嘅挑戰。 我諗冇理由 一個 連影印都做唔好嘅office boy。會夠膽要求自己成為部門主管。
要小朋友有勇氣接受挑戰去完成困難嘅事。 我哋就可以先從容易嘅事入手一層一層咁培培養上去。
